प्रसिद्ध शेफ श्री.विष्णू मनोहर ह्यांच्या हस्ते 'सांस्कृतिक वार्तापत्रा'च्या 'राष्ट्रसमर्पित कलासाधना' विशेषांकाचे प्रकाशन

     सांस्कृतिक वार्तापत्राच्या कर्वेनगर येथील कार्यालयाला विष्णूजी की रसोईचे संस्थापक प्रसिद्ध शेफ श्री.विष्णू मनोहर यांनी गुरुवार दि.२० फेब्रुवारी २०२५ रोजी भेट दिली. सांस्कृतिक वार्तापत्राने तयार केलेल्या  ‘राष्ट्रसमर्पित कलासाधना’  या विशेषांकाचे प्रकाशन विष्णूजी मनोहर यांच्या हस्ते करण्यात आले. या प्रसंगी रा.स्व.संघाचे प्रांत कार्यकारिणी सदस्य श्री.दिलीपजी क्षीरसागर, कोथरूड भागाचे प्रचारप्रमुख  श्री.प्रकाशजी देशपांडे, सांस्कृतिक वार्तापत्राचे संपादक श्री.मिलिंद शेटे, व्यवस्थापिका सुनीता पेंढारकर, सह संपादक मेघना घांग्रेकर आणि कार्यालयाचे कर्मचारी उपस्थित होते.

‘राष्ट्रसमर्पित कलासाधना’ या अंकात भारतीय कला ज्यातून राष्ट्रप्रेम किंवा राष्ट्राप्रतीचा आदर आपल्या कलेतून आपण कसा दाखवला याबद्दल मान्यवर कलाकारांनी आपापले अनुभव सांगितले आहेत. तसेच संबंधित कलेची माहिती सांगून आपली भारतीय संस्कृती इतरांपेक्षा कशी निराळी आहे हे दाखवून दिले आहे.    

यातलीच एक कला म्हणजे ‘पाककला’. भारतीय संस्कृतीमधील ‘पाककलेने’ आज संपूर्ण जगात मोठे स्थान निर्माण केले आहे. यात श्री.विष्णू मनोहर यांच्यासारख्या शेफचा वाटा फार मोठा आहे. आज भारतीय पदार्थांना जागतिक पातळीवर नेणाऱ्या श्री.विष्णू मनोहर यांनी आपले अनुभव सांस्कृतिक वार्तापत्राच्या ‘राष्ट्रसमर्पित कलासाधना’ या विशेषांकात लिहिले आहेत.  त्याबाबतचे अनुभव आणि अनुषंगाने मारलेल्या दिलखुलास गप्पा यानी त्यांच्या भेटीला रंगत आली.  त्यांनी सांगितले की नुकतेच ते प्रयागराज येथे महाकुंभास जाऊन आले. तेथे त्यांनी ११,००० किलोचा प्रसाद तयार केला. हा त्यांचा २८ वा विश्वविक्रम आहे.  विशेष नमूद करण्यासारखे म्हणजे त्यांनी त्यांच्या ‘विष्णूजी की रसोई’च्या सर्वच शाखांमध्ये (अगदी अमेरिकेतसुद्धा) डॉक्टर हेडगेवार, गोळवलकर गुरुजी,स्वा.सावरकर, डॉ.आंबेडकर यांच्या प्रतिमा आवर्जून लावल्या आहेत. 

सांस्कृतिक वार्तापत्राचे संपादक श्री.शेटे यांनी त्यांचा फोटो फ्रेम देऊन सत्कार केला तर व्यवस्थापिका सुनीता पेंढारकर यांनी त्यांना युगप्रवर्तक डॉ.हेडगेवार यांचा अंक दिला.

    कार्यालयात आणलेल्या पुरणपोळी आणि बटाटेवड्याचा आस्वाद त्यांनी घेतला आणि विशेष म्हणजे बटाटेवड्याचे खास कौतुक केले. त्यांनी सर्वांशी आपुलकीने गप्पा मारल्या. त्यात त्यांनी विशेषांकातील सर्व लेखांचे कौतुक केले. सर्वांनी आवर्जून वाचावा असा हा अंक जरूर विकत घ्यावा असं आवाहनही त्यांनी केलं. ही त्यांची छोटीशी भेट सर्वांसाठीच उत्साहवर्धक ठरली.