पठाणकोटमध्ये घुसखोर ठार; 'बीएसएफ'ची कामगिरी

 

नवी दिल्ली : पंजाबच्या पठाणकोट येथील आंतरराष्ट्रीय सीमेवर 'बीएसएफ'च्या जवानांनी २६ फेब्रुवारी रोजी सकाळी एका पाकिस्तानी घुसखोराला ठार मारले. पठाणकोटमार्गे एक व्यक्ती भारतात घुसखोरी करण्याचा प्रयत्न करत असल्याचे 'बीएसएफ'च्या निदर्शनास आले असता, 'बीएसएफ' जवानांनी त्याला इशारा दिला. परंतु, त्याने त्याकडे दुर्लक्ष केले आणि पुढे जात राहिला. धोका ओळखून 'बीएसएफ' जवानांनी घुसखोराला ठार मारले. 'बीएसएफ'च्या म्हणण्यानुसार, दि. २६ फेब्रुवारी रोजी संकाळी ताशपाटन सीमाचौकीवरील जवानांना सीमेपलीकडे संशयास्पद हालचाली दिसल्या. घुसखोर भारतीय सीमेत घुसखोरी करण्याचा प्रयत्न करत होता. सतर्क सैनिकांनी त्याला इशारा देऊनही त्याने लक्ष दिले नाही आणि पुढे जात राहिला. अशा परिस्थितीत, धोका ओळखून 'बीएसएफ' जवानांनी घुसखोराला ठार मारले. "घुसखोराची ओळख आणि हेतू शोधला जात आहे. या मुद्यावर पाक रेंजर्सकडे तीव्र निषेध नोंदवला जाईल," असे 'बीएसएफ' अधिकाऱ्यांनी सांगितले.