फरिदाबाद येथून एका दहशतवाद्याला अटक तर तिघांची संपत्ती जप्त

     गुजरात आणि हरियाणा एसटीएफने पाली गावातून एका दहशतवाद्याला अटक केली. पकडलेला दहशतवादी अब्दुल रहमान हा मूळचा उत्तर प्रदेशातील अयोध्येतील मिल्कीपूरचा रहिवासी होता. तो येथे शंकर नावाने राहत होता. त्याच्याकडून एसटीएफने दोन हातबॉम्ब जप्त केले आहेत. अब्दुलच्या अटकेच्या तीन दिवस आधी २७ फेब्रुवारीला जम्मूहून पळून गेलेला दहशतवादी परवेझ अहमद खान उर्फ पीके याला दिल्लीतील निजामुद्दीन बस्ती येथील गेस्ट हाऊसमधून पकडण्यात आले होते. काश्मीरमध्ये परवेझ लष्कर-ए-तैयबा, टीआरएफ आणि हिजबुल मुजाहिद्दीनसह विविध दहशतवादी संघटनांच्या आर्थिक नेटवर्कमध्ये महत्त्वाचा दुवा म्हणून काम करत होता. दिल्लीतून परदेशात जाण्याचा त्यांचा बेत होता. पाली गावातून अटक करण्यात आलेला दहशतवादी अब्दुल रहमान हा येथील एका फार्म हाऊसजवळ ट्यूबवेलसाठी बांधलेल्या चेंबरमध्ये राहत होता. चेंबर मालकाचे काही काळापूर्वी निधन झाले होते.

 

     तसेच पूंछ जिल्ह्यातील नियंत्रण रेषेला लागून असलेल्या कसबा आणि किरणी गावांमध्ये पोलिसांनी तीन दहशतवाद्यांच्या १४.८ कनाल (दोन आणि चतुर्थांश एकर) जमिनीवर पसरलेल्या चार मालमत्ता जप्त केल्या. त्याची किंमत जवळपास २८ लाख रुपये असल्याचे सांगण्यात येत आहे. हे तीन दहशतवादी गुलाम जम्मू-काश्मीरमध्ये लपून बसले होते व भारतीय हद्दीत दहशतवादी कारवाया करत होते. हे तीन दहशतवादी नियंत्रण रेषा ओलांडून काही वर्षांपूर्वी गुलाम जम्मू-काश्मीरमध्ये पळून गेले होते. त्यांच्याविरुद्ध पूंछ पोलीस ठाण्यात एफआयआर दाखल करण्यात आला.